Nav Şêrîna Min
Tu hatî navşêrîna min
Evîn û xemrevîna min
Were xweşke birîna min
Bi xemla xwe tu wek Zîn î
Şepal û şeng û şêrîn î
Ji dozê ra tu durbîn î
Bi dildara xwe pir rind î
Bi rûheyv û şekerxendî
Di vê rê da hunermend î
Ji min can û ceger kuştin
Dil û mêlak hemî mijtin
Tijî tîr û ber û xiştin
Bese ev jîna berbatî
Bese ey dilber û gawir
Nebarîne li min awir
Te can û dil kirin agir
Xerabatim li vê meyxanê
Me mey da Ehmedê Xanê
Cizirê te kirî fincanê
Ji kûp û kûzkên Batê
Hezar û sed evîndar in
Di vê rê da birîndar in
Bi qêrîn û bi hawar in
Cegerxwîn bes bike forta
Te dil da ber şûv û rota
Tu pîr î lê wekî xorta
Bi xwe kohê Ereratê